ИДЕТЕ ОТ МЕНЕ ПРОКЛЯТИИ В ОГНЬ ВЕЧНЫ.

Святые Текста читайте на старославянском!

Комментарий-транслитерация:

Евангелие:

“Тогда речет Царь сущиим одесную Его, приидете благословени Отца Моего, наследуите уготованное вам Царствие от сложениа миру, взалках бо ся и дасте Ми ясти, вжадахся и напоисте Мя, странен бех и введосте Мя, наг и одесте Мя, болен и посетисте Мя, в темници бех и приидосте к Мне, тогда отвещают Ему праведници глаголюще, Господи когда тя видехом, алчюща и напитахом, или жаждуща, и напоихом. Когда же Тя видехом странна, и введохом, или нага и одехом, когда же Тя видехом боляща или в темници, и приидохом к Тебе и отвещав Царь речет им, аминь глаголю вам, понеже створисте единому сих братии Моих менших, Мне створисте, тогда речет и сущиим ошуюю Его, идете от Мене проклятии в огнь вечны, уготованны дьяволу и аггелом его, взалках бо ся и не дасте Ми ясти, вжадахся и не напоисте Мене, странен бех и не введосте Мене, болен и в темници и не посетисте Мене, тогда отвещают Ему и ти глаголюще, Господи, когда Тя видехом алчюща или жаждуща, или странна, или нага, или болна, или в темници, и не послушахом Тебе, тогда отвещает им глаголя, аминь глаголю вам, понеже не створисте единому сих меньших, ни Мне створисте, идут си в муку вечную, праведници же в живот вечный”.

Толкование Феофилакта Болгарского:

“Сущии ошую Его в огнь посылает, еже уготовал есть дьяволу, понеже не милостивни суть бесове, и многу вражду имеют на нас, достоино убо и таково, иже муце предаеми бывают, подобни и нравом бесовьскым, иже своих ради дел прокляти бывше, разумеи же, яко не уготовал есть Бог огненыа мукы человек ради, но диавола ради, аз же сам себе творю мукам повинна, ты же устрашися человече разумев от сего, яко си ни блудници, ни убиица, ни похищници суще в мукы послани бывают, но понеже не створиша ничто же благаго, в истинну бо аще разумно смотриши, тот есть похищьник, имеаи многая, и не милуа другаго, аще бо и не взмет иному яве, но еликаа изобилнаа имат паче потреби своеи, похытил есть веде от неимущааго и требующа, и не дающа ему от избытка своего, аще бо имениа своа в опщее поставил бы, никто же оскудел бы имением, но понеже сбрав сиа затвори, и яко своа имат, сего ради прочии страждут нищетою, отнюду же не милостивыи яко похищник осужден будет, понеже толикых обидит, еликых не может направити имением, имже у себе сдержит и не дает, отнюд же по правде таковыи в мукы вечныа идут, праведни же в вечны живот, яко же бо Святии непрестанно веселие имут, тако и неправдни непрестанныа мукы, аще и Ориген баснословит безумно, прельщаа безумны глаголя яко имат быти конец мукам и не будут присно мучими грешнии, но есть время рече егда в места праведныих приидут муками очищени бывше. Обличает же ся безумие его яве глаголящу Христу мукы вечныа сиречь николи же мимиходящее, именующу же и праведных овца, грешныа же козлища, яко же бо козлищь николи же овча быти может, тако ни грешный очиститися может тогда, и праведен быти, тма же кромешняа, еже есть далече Света Божественаго, сего ради и лютеишаа мука есть, яко далече от Бога сущи, есть убо и вину сицеву рещи о том грешный бо и здеси тму имат, грехми отлучився Света Божественаго, но понеже надежда есть покааниа, сего ради несть кромешняа сиа тма по смерти же аще не покается, и предстанет делом истязание, приемлет его тма кромешняа, несть бо к тому надежа покааниа, но конечное лишение Божие благости приходит, дондеже бо зде есть грешный, аще и мала приемлет благая Божия чювственаа сиа глаголю, является како любо, яко и еще раб есть Божий, и в дому Его есть, сиречь, в твари века сего пребывая, и от Него питаем, и схраняем, тогда же везде отлучен будет от Бога, ни единому благу причастен бываа, се бо есть рещи тма кромешняа. | \яко в надежи покааниа сущу грешному. Ты же крепко бегаи немилосерднаго нрава, и делаи милостыню, чувственую же, но и духовную паче, напитаи же Христа, алучюща наше спасение обаче же и алчюща и жадающа поучение аще напитаеши и напоиши Христа напоил еси и напитал, в христианине бо cущаа вера Христос есть, и питается и растет поучением, обаче же и аще кого узриши устраншася, и далече суща Царствиа Небеснаго приведи, сиречь с собою его прием поучением, с ним и ты вниди, и оного введ, да не другым проповедаа, сам не потребен будеши, аще убо и не тленьную ризу свлечет, юже Святым Крещением приял есть и обнажися облеци его, и изнемагающаго верою яко же Павел глаголет, приемли и затвореннаго в темници плотию, сею мрачною посети яко светом просвещаа его поучением, сиа убо вещи любве свершаи телесно, обаче же паче и духовно, сугубем бо нам сущим, телом глаголю и душею, сего ради и взможно есть сиа сугубо исправляти”.

Слава Исусу Христу!

Павел Новиков.