МОЛИТВЕННОЕ ПРАВИЛО ИЗ КОРМЧЕЙ 15-16 ВЕКА.

Священные Тексты читайте в оригинале в первоисточнике-рукописи – на фото на старославянском.
Комментарий-транслитерация на Священные Текста:

[став убо на обычном месте, идеже потребно есть молитися, створи убо съ смирением и съкрушением сердца, поклон до земли глаголя стих первый]

Боже очисти мя грешнаго и помилуи мя и прости мя. Бес числа сгреших Господи помилуй мя и прости мя. Създавый мя Господи помилуй мя и прости мя. Боже милостив буди мне грешному и помилуй мя. Боже прости безакониа моя и сгрешениа. Пресвятая Богородице Владычице моя помилуи мя спаси мя, помози ми ныне в жизни сеи, и в исход душа моея, и в будущом веце. Непобедимая и Божественая сила честнаго и животворящаго Креста Господня помилуи мя и помози ми грешному. Вся небесныя силы, Святии Аггели и Архаггели, Херувими и Серафими, помилуите мя, и помолитеся о мне грешнем. Аггеле Христов хранителю мои Святый помилуи мя и помолися о мне грешнем, и помози ми ныне в жизни сеи, и в исход душа моея, ив будущом веце. Святии Апостоли, и мученици, и Пророци, стли Преподобнии и Праведнии, и все Святии помилуите мя, и помолитеся о мне грешнем Господу Богу, и помозите ми ныне в жизни сеи, и в исход душа моея, и в будущом веце. Господи или словом или делом или помышлением, сгреших в всеи жизни моеи, помилуи мя и прости мя милости Твоея ради. 11 поклон до земли. Став с умилением. Глаголи молитвы сиа. Боже оцести мя грешнаго и помилуи мя яко николи же створих благое пред Тобою но избави мя от лукаваго, да будет во мне воля Твоя, и да не осужденно отверзу уста моя недостоиная и всхвалю Имя Твое Святое, Отца и Сына и Святаго Духа, и ныне и присно и в векы веком аминь.

Молитва 2-я Исака Сириянина.
Господи Исусе Христе Боже мои, посещая тварь Свою, Тебе явлены страсти моя, немощь естьства моего, и крепость супостата моего, Ты Сам Владыко покрыи мя от злобы его, зане же сила его крепка, и естьство мое страстно, и сила немощна, Ты убо Благый ведый немощь мою, иже нося неудобьство безъсилиа моего, схрани мя от помысла смущена и потопа страстеи, и достоина створи мя сея службы святыя, да не како в страстех моих растлю сладость ея, я обрящуся бестуден пред Тобою и дерзостив, но милостию си помилуй мя, яко Благословен еси в векы аминь.

Молитва Стефана Фивеискаго

Владыко Господи Исусе Христе, Ты Помощник мои буди в руку Твоею аз, да не оставиши мене сгрешити яко прельщен есмь, да не оставиши мене последовати хотению моему лукавому, да не оставиши мене погибнути в гресех моих, ущедри сзъдание Свое, не отверзе мене от лица Твоего грех ради моих, яко к Тебе прибегох, и исцели душу мою яко сгреших Ти, пред Тобою суть все оскорьбляющеи мя, и ищущеи душу мою изяти ю, и несть прибежища иного токмо к Тебе, Господи Господи спаси мя милости твоея ради, яко Ты еси Господи силный во всяческых, яко Твое есть Царство и Сила, и Слава Отца и Сына и Святого Духа, ныне и присно и в векы веком аминь.

Молитва Иоанна Златоустаго четвертая

Господи аще хощу а не хощу спаси мя, понеже бо аз яко кал любовещный греховную скверну желаю, но Ты яко Благ и всесилен можеши взбранити, аще бо праведнаго почтиши ничто же велие, аще чистаго спасеши ничто же дивно достоини бо суть милости Твоея, но на мне паче Владыко окааннем и грешнем и сверном, удиви милость Свою, покажи благоутробие Свое, Тебе бо оставлен есть нищий, обнищав всеми добрыми делы, Господи спаси мя милости Твоея ради, яко благословен еси в векы аминь.

Молитва 5
Владыко помилуй мя благости Твоея ради, и не остави мене заблудити от Твоея Воля, и не отверзи убогыя молитвы моея от Твоего лица, но услыши Господи глас молитвы моея, егда молюся к Тебе во дни и в нощи, и приими яко избранно кадило, и не взбрани грехов моих ради благодати Твоея, но спаси мя Имени Твоего ради Святого, Твоя бо есть единаго еже миловати и спасати нас, и Тебе славу въссылаем Отцу и Сыну и Святому Духу, и ныне и присно и во веки веком аминь.

Таже помолився предочистив себе, целуи крест свои иже носиши на персех, знаменався им глаголи сице, Господи Исусе Христе Сыне Божий благослови и освяти и схрани мя силою Креста живоноснаго Ти

Таже начни сице. Господи Исусе Христе Сыне Божии молитв ради Пречистыя Ти Матере и всех святых Твоих помилуй нас аминь. Та же, Слава Тебе Боже наш слава Тебе, всячьскых ради, [молитва] Царю Небесный, та же [молитва] Тресвятое, и по [молитва] Отче наш, Господи помилуй 12, та же [молитва] Придете поклонимся трижды (?), та же [молитва] Псалом 50 Помилуй мя Боже, та же [молитва Символ Веры] Верую в Единого Бога, та же или поклоны клади, или молитву Исусову, или Псалтирю говори, сице убо ти есть начало правилу, на всяк день, не безделно же убо есть се, но от Божественых Писании изобретох, многа убо преданиа иноческая прочтох с многи старцы, и досточюдными мужи беседовах, како начати правило свое держати, мнози убо многа начинают, пакы мале обретаются свршающе, не ведуще меры в правиле своем, похвално убо есть еже начати, тоже и кончяти, мнози убо не ведуще начяти правила своего в келии, яко в тме шатаются в неведении, тебе же яко верну рабу Христову и любовну ми о Христе, сиа изложих писанием, яко да схраниши в все время живота своего, правило же твое да будет умереное на кииждо день 4 кафизмы, да два канона, поклон 300, молитвы Исусовы 600, и семоесто (?) Пречистой еже есть сице, Владычице моя Пречистая Богородице помилуи мя грешнаго, к тому же и павечерница, и полунощница, и кажение Святым, 2 (?) или идинощи, се убо есть правило малое предано от Святых Отец маломощным, тебе же юну сущу и здраву телом, аще хощешь и будет ти возможно, сдержи убо среднее правило, еже есть сице 9 кафизм, и 600 поклон, тысяща молитвы и двесте третьеесто (?) Пречистой, и часть Евангелиа, и канон, вся же сиа съветом игумена или отца своего духовнаго, или старца, бес тех же съвета ничто же делаи духовнаго дела, по вся же дни и вечеры да исповедаеши им грехи своя и помышлениа, сиа свершив, и мене многосгрешившаго поминаи, да сам от Бога поминовен будеши [предание от устава Святых Отец] иже в общем житьи пребывающим иноком и не умеющим писаниа книжнаго, не токмо иноком, но и всем Богобоязнивым и мирьским, за всю Псалтирю 6000 молитв Исусовых, а за половину Псалтири 3000, а за кафизму 300, а за Славу 100, а полунощницю 600, за утреницю полторы тысящи, за часы с почясием такоже, а бес почясия 1000, за вечерню 600, за павечерницю великую 700, а за малую 400, сице уставиша Святии Отци, овому реша 5 кафизем, и 300 поклон, и 500 молитв, овому же половина Псалтири, и 400 поклон, и 600 молитв, овому же весь Псалтирь, и 600 поклон, и 1000 молитв, овому 1000 поклон или 2000 молитв, тако же аще ли кто произволит множае ни токмо иными труды обаче же отци наши уставиша по разсужению, и по произволению и еже по силе, и да есть ти в келии обычное правило 3 кафизме и 300 поклонов и 600 молитв, церковное же пение по уставу схраняи, да не отлучишися никако от Церкви Божиа, кроме нужы некыя, имеи же непрестанно к Богу памет, еже взывати, Господи Исус Христос Сын Божий помилуй мя грешнаго, или стоиши или ходиши непрестанно глаголи, такоже и смерть вспоминаи како хощеши умрети и ответ дати Богу.

Слава Исусу Христу!

Павел Новиков.