О ТОМ, КАК В БОГА БОГАТЕТЬ.
ЧТО БОГАТЫЙ, ЧТО УБОГИЙ МОЖЕТ ГОВОРИТЬ – «ЧТО МНЕ ДЕЛАТЬ, Т.К. ЧЕГО-ТО НЕ ИМЕЮ».

Читайте ОРИГИНАЛ без искажений и дополнений на ФОТО на древнерусском.
Комментарий-транслитерация (для новичков в помощь, для ленивых во вред):

Комментарий-транслитерация:
Евангелие:
Рече же притчю к ним глаголя человеку некоему богату угобзися нива, и мышляше к себе глаголя, что сътворю, яко не имам где събрати плод моих, и рече, се сътворю разорю житница моа, и болшая съзижду, и съберу ту вся жита моя и благая моа, и реку души моеи душе, имаши многа благая лежащи на многа лета, почиваи, яждь, пии, веселися, рече же ему Бог, безумне, в сию нощь душю твою истяжут от тебе, а яже уготова кому будут, тако сбираяи себе, а не в Бога богатея, сиа глаголя възгласи, имеаи уши слышати да слышит

Толкование:
Рекь яко не въ множьстве богатьства живот человеку продолжается, к извещению сему наносит притчю, и виждь како пишет нам, не разумнаго богатаго помыслы, Бог убо Своа творит, и Свое милосердие являет, не бо едина нива богатаго, но вси плоди его угобзишася, он же таков бе бесплоден милосердием яко прежде приатиа держаше, виждь же богатьства злобы, что створю, такыи глаголаи убогыи глаголет, что сътворю, яко не имею чим жив быти, и како одежюся, виждь же мии(?) богатаго глас(?), что сътворю яко не имею где съберу плоды моа, добрыи покои, равен со убогым, рече убогыи, что сътворю яко не имею, и богатыи, что сътворю яко не имею, что же приобретаем от излишняго богатства събираема, покоя убо не обретаем от печали, грехов множество себе събираем, разорю моя житница, и болшая съгражду, аще ли ина приидущее лето, пакы угобзится нива обило, пакы ли разориши, и съградиши, что полза разоряти и съграждати, имаши житница убогых утробы, много могуща вместити, и не разоримыи не тленны, Небесный бо суть и Божиа, кормяи убо нища, Бога кормит, зри же и иного неразумиа, жита моа благая моа, не бо мняше таи от Бога имыи, аще бы от Бога мнел строима, не бы о них тако прилежал, но от своего труда таи(?) жита мняше, тем о них обращаяся таи(?) глаголаше, жита моя благая моя, ни единого рече имею обещника, ни единого деляща створяю, не Божиа сут но моа, един же наслаждаюся, и, ни Бога прииму в сие наслаждение, а поне тако того неразумиа, и прочее, душе имаши многа блага, лежаща на многа лета, долготу сам себе подавает животу, яко же от земля то взделав, еда твоя суть жита, яждь, рече, пии, веселися, о благо(?) твоеи души, еже бо ясти и пити, и скотии(?) души благо, таковую убо имеет скот душю, достоино еи предлагает, словесныа же душа благое, разумеваи, еже мыслити веселитися Законом Божиим и разумении благыми, не довлеет ли ти ясти и пити о безумне, но последованием сим, срамну и скверну сласть, повелеваеши души, наипаче бо Господь еже то веселитися, нечистыа страсти яви, яже сытостию брашен и питиа бывают, рече же ему Бог, безумне, в сию нощь душю твою истяжут, не яко Богу беседовавшу к богатому глаголется сие, но се есть еже глаголет, но сице ему помыслившю, рече Бог, обычаи притчи, акы выше что указати, безумна убо его именует, яко всяко безумне съвещавшу, яко же и указахом, безумен бо и суетен всяк таковыи, яко же Давид глаголет, всуе всяк человек, сбирает и не весть кому събирает, како не безумен и не разумив, яко животу мера от Единого Бога, виждь же и речениа, истяжут бо рече, яко не милостивии мытаре, страшне Аггели душу твою истяжут неволею, праведного бо душа не истяжется, но предлагается Богови и Отцю Духом радующися и веселящися, и ничто же нужди имат изыти от тела, легкым бо бременем тела облежит, грешныи же одебелив душю телом и сътворим ю земну, с нуждею имат отторгнути ю ис тела, тем истяжут ю глаголет, яко же от зла должника, виждь же не рече истяжю душю твою, но истяжут, праведных бо душа в руце Божии, по правде бо в нощи истяжется душа таковаго, не бо имат Света Божиа разума освещающаго и, но в нощи златолюбиа сы, и оттого омрачен смерти предается, тъ и есть сбираяи себе, по истине же безумен нарицаем, нищим же и Богови събрав не имат тако. Потщимся убо в Бог богатети, се же есть на Того уповати, и Того, наше богатьство имети, и скровища не рещи благаа моа, но благая Божиа, да аще Божиа суть благая, не отвращаим Бога от благых Его, то есть в Бог богатети и веровати, аще вся дам и истщу ничто же добрых лишюся, скровище бо ми есть Бог, отверзу и възму потребная.

Слава Господу Исусу Христу!

P.S.: Уважаемые читатели, читайте рукописи на ФОТО на древнерусском! Наша работа нужна лишь для того, чтобы помочь новичкам научиться читать оригинальные тексты на древнерусском. Научившись читать, у вас открывается доступ к первоисточникам – к Правде Божией! Вам тогда не нужно будет верить на слово всяким «лжеучителям», у вас появится возможность самостоятельно изучать истинных православных учителей и труды Церкви Христовой! Мы же в своих комментариях (помогая вам прочитать) можем и навредить – мы можем ошибаться, не принимайте нашу писанину за Правду Божию!!!

Павел Новиков (читатель-редактор).